A caald winter’s nicht
Starn heich in the lift
A lass wi a bairnie
Ahint a snaa drift.
Come in through the byre
Step ower the straw
Draw ben tae the fire
Afore the day daw.
The bairnie will sleep
By the peat’s puttrin flame
Oor waarmin place, lassie,
This nicht is your hame.
Come morning the snaa
Showed nae fuitprints at aa
Tho the lass wi the bairnie
Had stolen awaa.
An we mynded anither
A lang while afore
Wi a bairn in her airms
An the beasts roun the door.
by Josephine Neill